SUBRINHA KI N KRE TXEU

Subrinha,

Na merkanu bu skrebe-m
na berdianu N ta risponde-bu
so es falar nes universu
e fiel skultor di nha alma

Es papia-m di bu amor
pa umanus, patrisius i familia
N ka ntendeba dretu
onti N tra midida
di tamanhu bu kurason
seriedadi bu sentimentu

Sin,
bu fotu e konpustura
pa tudu videntis
Ramos bu pega
formozura nos familia
postura nos rasa

Kaligrafia janota
altura bu disiplina
stabilidadi bu konsentrason
ditalhi bu amor

Tras des letras rodondu
bu dosi vos
molda bu pensamentu
vivifika nha mimoria
gratu i distanti

Sodadi e txeu
distansia e grandi
mas grandi e Dios
mas largu e Mundu
nos odjus ta bira kuatru
na skina di tenpu
tudu sta na Se mon!

Deus obi-m es presi
dirama txeu alegria
di grandeza se dizeju
largura se enpenhu
riba se meigu kurason
nes Nobu Anu !

Marsianu nha Ida padri Nikulau Ferera

Puema e Fotu: MARCIANO RAMOS MOREIRA